2008年10月31日

Halloween ~
係我放工前，你去了剪頭髮，剪到個頭好似個波咁 ，都係上次果個剪得你靚仔d .. 下次記得搵返佢啦 ..
原先，以為係青衣等你，但後來你好趕咁，趕到黎九龍站join埋我 。隨後，我地決定先買飛睇戲，後食飯..
買飛的時候，有一段小插曲，就係出戲票的機壞了，弄得我們的飛爛了，但最終反而令我們有2張一樣坐號的戲飛呢 。
唔知點解，今日成日都想攬住你 。

2008年10月29日

成日都未能確定到你係未mind我之前個 phone call 的事 (當然我估你唔會啦，但都係未確定嘛)，你又好忙，話出去食午飯時打俾我，結果又冇打，等到4點幾先打電話黎仲話今晚都係唔出街，心情就更谷底啦... 點知你又露出馬腳，問我幾點收工，咁即係會接放工啦 hahahahaha.... (心情的起伏有點似 hang seng index )
你話你唔捨得發我悔氣 ...
見到你黎接我，心情好唒... 開心哂，仲感覺好甜添 。

2008年10月28 (續)

唔開心。唔開心係因為不能理解，為何只有兩位好友明白自己，另外的朋友都說一些discourage的說話。你曾說這只是因為其他朋友們不認識你罷了，但其實兩位好友又何曾知道你實際待我如何呢? 朋友們的說話聽得多，心中或多或少都會有些動搖，或者說動搖係有一點誇張，但至少都會反覆想想自己的諗法有沒有不妥。
聽罷朋友的說話，心中已不是味兒，感覺亦不是太好，不是我不想說給你聽，而係我不知該如何說起、該如何去表達自己心中那少點兒的不安。你已經很累了，不停打呵欠了，教我如何忍心在夜裡仍要你花精神去"小心"聆聽我的話呢 ? 你我都知道，我們都很在意對方的感受，若是要你在很疲累的時候，不能睡，又要留心聆聽、回應我 (在意我)，我實在不想呢。
你剛才掛線的聲音，有點悔氣，是氣我有野唔話你知嗎 ? 還是嬲我呀 ?
睡不了，爬了起床，寫了這篇。
Love

2008年10月28日

頭先，我發現了一件巧合到不能再巧合的事呀 ~~~~ hehehe 我係唔會話你知係咩事架 .... wakakakakaka

2008年10月27日

不經不覺，我倆拍拖一個月啦....

2008年10月26日

自相識以來，交換電話後，第一晚我們沒有談電話

2008年10月25日

女人嘛...... 就是喜歡胡思亂想
終於，跟你說了我心中覺得不舒服的事情，真係男女大不同啦，其實我都知道係因為大家都忙，所以溝通少了，並唔係乜野其他原因，又係我諗多左囉.... 。其實，大家肯坦坦白白講自己喜歡什麼、不喜歡什麼，或者自己心裡面的感覺都係一件好事，最少對方可以明白自己怎樣諗，唔使估估下，或者屈住屈住，對大家都好，所以呢.. 你都要多d同我講下你的諗法先好喎 。
亦於今天，終於第一次聽到你完整地說了一聲 "我愛你" 。

2008年10月24日

全日你都冇打過電話俾我，可能你好忙啦~~ 淨係將近放工，要約大家係邊度見面時才給我一個電話 。
是夜，我們去了佐敦的一間齋舖食晚飯，佢地d餸都幾似肉類呀，食完又冇口乾，都幾口味，我最鍾意佢地既茶，好好飲呀 ~~
吃過晚飯後，你說很久沒有跟我行街啦... 其實我都係度諗緊食完飯做d咩好... 例如：好唔好去睇戲咁.... 既然，你話去行街街，當然係跟你啦~~
因為我穿了一對新鞋的關係，有點刮腳，如果行得多路會好痛，所以我地去了買膠布，但係我真係估唔到，你會肯眾目睽睽之下，係starbucks幫我貼膠布架，仲要係我"遞"俊腳俾你貼喎，我相信好多人都唔肯架..... 你對我真係好啦... 如果成日都係對我咁好就更好啦...
行i.t.既時候，你係度睇緊鞋，好似d款唔係好啱，我話慢慢揀啦，你話 (當時係捉住我隻手) 這個咪揀好囉.......

2008年10月23日

晚上，跟你談了一會電話，我說下星期你會有多一點時間溫書，你問點解，果時我係諗，下星期好似冇咩特別的事情要做，同埋因為你冇night job 囉，如果你有night job，做一日，俾你瞓番兩日都唔夠架嘛，咁咪浪費了很多時間囉.. 跟住你細細聲同我講 "咁我都要有d時間陪你架嘛"... feel happy ar ------> ，因為你都識得諗下我 。

2008年10月23日

幾日冇見，尋日見到你，忽然覺得你好似又靚仔左 。
你做完gym，跟住黎接我放工，嘩..... 你好多汗呀.. 個身仲好熱添，是因為趕過來接我嗎? 我諗你拖住我可能覺得仲熱 。
尋日，直頭破紀錄啦，行左好多好多路，我地由中環步行至灣仔，你行到腳仔軟呢.. 跟住，我地係灣仔的三六九飯店食上海野，有我最喜愛的小籠飽，你仲夾餸落我個口到 ，仲幫我撥頭髮添 ..... "窩心"了唄 。
你講得啱，我地真係要開始認真溫書啦.... 如果再唔溫書，我都驚會follow 唔到個study plan，你都要努力呀... 快d考埋個試，做好個presentation，咁就安落哂啦.... 還記得你考試成績好的獎勵嗎 ... 。
忽然記起，你又話俾張咭片我既....

2008年10月22日

昨晚，因為你有night job，所以要早點睡覺，待凌晨一時起床後上班去，原先你想吃過晚飯後就去睡，但係我地傾電話都傾到九時半呀，知道你要多點時間睡覺，但又唔捨得收線 ，攪到你又少了一點時間睡覺了 ，之後，我以為你乖乖的就寢 ，但原來你睡不著，十時半又打電話俾我，是因為太掛住我嗎 ? 你再打電話俾我，我又可以聽到你把聲，好開心呢....
你話會今朝早七時，俾個morning call 我，但你沒有呀... 可能仲忙緊啦，未有時間打..... 再過了一會，大約八時，我快要出門口了，這才收到你的電話，說剛剛收工並準備去吃早餐，果一刻，我完全feel到你對眼掛了兩個大袋呀 ..... 我今晚唔要攬住隻熊貓囉 ，所以你要係我返緊工的時間，努力sleep先得啦...
好想快點見到你，希望我唔使OT啦 ..

2008年10月21日

想搵人嗲下的時候，問你如果公司炒左我，你養我好唔好? 你居然答我每日俾一碗白飯我.... 哼 !!! 唔睬你呀.... 以後都唔問你這個問題，而你以後問 "有關"的問題，我都一概唔答..... 哼 !!!

2008年10月20日

剛過去的週末，我都要返學，好攰呀 ~~
星期六那天，一早就見到你啦，你陪我返poly拿library card，跟住我就陪你去CU返學，仲係CU飲茶添，你食完野係度睇報紙果個樣，感覺好歎茶feel喎 。
到了你上學的時間，我就約了朋友係CU聚一聚，順便可以接你放學嘛 ... 我仲識得自己由canteen 落返去mtr station 門口等你，好叻呀... 。好不容易，終於等到你放學的時間啦，你見到我的時候，樣子好像很累、沒精打采，又唔拖我，唔知係未怕你的同學見到呢
跟住，你就送我返學啦，仲陪我食埋dinner先至走 ，是夜，我都有4個小時的堂，第二朝都要上5個小時，所以昨晚跟你講電話時，你問我 "做乜突然間好似好攰咁.."，其實由我拿了很多東西回家之後，已經覺得成個人散哂，跟住仲要換床舖，換完之後，簡直唔郁得啦... 今晚，仲有堂要上添.... help ~~

2008年10月16日

原先見你好攰，如果我去接你放學，跟住你又要送我返屋企，咁你就會攰上加攰... 所以我就俾左兩個 offer 你，一係我會去接你放學，咁我地又可以見到大家，一係我唔接你，咁你就可以放學之後，乖乖咁返屋企休息。Finally，都係confirm左你會放學返屋企，that means 你的選擇係 "Sleep > Me "... 哼 .... 。
原先係諗住唔見你架，但到晚上八點幾，send 左個message俾你，話想去接你，待我send 完message不久，唔使2分鐘，你就覆message俾我叫我去接你 .. 後來，你話我知你係等緊我send message 俾你 ，我都覺得奇怪架啦.. 平時你既 message邊有覆得咁快呀，我仲以為你會放學先睇到我send 左 message 俾你 .. 我既 message 話想去接你，唔係叫你唔好 fishing，係未估唔到呢 ?
我有諗過唔話你知，靜雞雞係門口等你架，但係又怕你會早走了，或者 miss 左等唔到你，白行一趟，又或者可能會見到第2個女仔衝出黎撓住你隻手走左 (just kidding )，總之就係驚接唔到啦... 但事實上，你個course又overrun 喎，咁到夠鐘放學的時候，打唔打俾你好呢 ? 打左又冇 surprise 架喎.... so many questions ，所以都係話左俾你聽先 。
明天，我約了同學們吃飯，希望你可以早點放工回家休息休息 ，星期六再見啦

2008年10月15日 (續)

哈哈哈.... 接放工，玩驚喜 ?
大約5點幾打電話給你，談了一會後，你要掛線了，我問你係未好忙，你就依依哦哦，我都唔記得你答乜野 lu~，只係記得你問我幾多點放工，當時已經諗點解你問得咁怪0既，一向你都知我6:30放工架啦... 莫非.... hehe
6:30啦~ 你打電話俾我問我放工未，唔知點解呢 ? 我有一種感覺覺得我係會見到你的 (心有靈犀 ? )，所以我就問你.. 你係邊度 ? 你答得好好笑... "唔... 係郵筒等你" ... BINGO ! 跟住我就快手快腳咁執野，落樓找你啦...
唔知係未覺得會見到你呢 ? 好好好驚喜又唔未到，但係好開心、好甜囉 ，似乎下次你要我覺得surprise，還要努力努力喎 ...

P.S. 見到你個樣又攰、又冇精神，但仲走過黎接我放工.... 有點心痛呀

2008年10月15日

尋晚，同你講留唔留得住你的問題，是因為越愛您、越害怕有一天您會離開我，亦可能真係我聽得太多別人講了，除了 S小姐及W小姐兩個的反應係正面外，其餘的朋友，一係叫我唔好放太多的感情，一係就話你依家當然會對我好好啦... 第日就唔係咁架啦..... 等等等等.. 都幾discouraged 。
我係跟你認真的，亦希望我地的關係係 long term，但我冇好完全將"long term" 同 "結婚"劃上一個等號，因為我唔知道你的想法，亦怕又係我自己想得太多，你知啦... 你好慢慢慢...慢架嘛，想得太多我地日後既野，而你又遲遲未做，我會好唔開心架嘛，所以簡簡單單想 "long term" 就算了。在尋晚之前，我當然理解你係想 long term, 但未必等於你想結婚架嘛，因為你從來沒有表達過有關的睇法，而我又唔覺得你會係好快同我結婚的人 ("好快"的意思係 within one to two years)。如果你係果種拖好耐都唔結婚的人，我肯定我父母一定叫我離開你，唔好浪費時間，正如初初我話俾佢地知有個人對我好好，但我地唔係拍拖的情形係一樣架，佢地話 "呢個男仔係未架... 唔係就唔好哂時間啦.."，佢地好似深怕我沉醉於一樣冇可能或者冇結果既野的時候，而忽略了其他的"chance"，結果什麼也沒有，或者是因為家姐太早結婚吧，弄得他們害怕這個幾年冇拍拖的女會嫁唔出，如果再做埋d冇結果的野，一年復一年，就更加怕我到最後什麼也沒有。
有時候，我會好silly 咁問你會唔會好鍚我、會唔會離開我、會唔會鍾意第2個 ...等等，你俾我的答案都好"positive"，但我都係當你表達了果一刻的感覺，日後是否還這樣，真沒多想，就當是甜言蜜語般聽著，因為果一刻我喜歡聽，亦知道你係唔會俾第2個答案我。尋晚，誤打誤撞下，講起關於結婚的事情，我才知道你的想法，這比起甜言蜜語般的說話來得確定，好像認定了一樣事情咁... 好實在。
你說例如within 2、3年...... 又話within 1、2年你會覺得有壓力，咁係乜野壓力呢 ? 問你又唔講，講左第2樣野..

2008年10月13-14日

好開心呀~~ 係第101日的今天，你又接我放工啦 。
之後，我地去了羅富記食粥，佢地個粥底有粟米味架...好好味呢... 唔知係未因為同你一齊食呢 ，所以份外覺得好味 。飯後，我地係 H&M 走了一圈，跟住就乘巴士回家啦...
是夜，你係我家留了一晚，抱住你瞓的感覺好實在、好舒服、好暖粒粒呀 ... 你提議明早早d起身去飲早茶，仲話咁樣一齊起床去吃早餐，好老公、老婆feel 。
於是，我地就清早6時起身，起床去飲早茶了，可能時間尚早吧，我地就好似係全個茶樓最後生的兩個 ..
吃過早餐以後，我地就準備返工啦.. 原先我以為陪你先乘 mtr 到旺角後再返公司，但你好體貼咁同我講話你的時間比較flexible，所以可以先送我返中環 (抵鍚 ) ... 有你送我返工的感覺好好呀，好warm呢 ..

2008年10月12日

今天，是我們相識的第100天。
我們約好了去海洋公園遊玩，一大早我地係IFC的 Canteen 食了一個 "靚人靚景"的早餐 ，然後再乘巴士到海洋公園。
到達海洋公園後不久，我們看了一個小雜技，表演者都是一些大陸的小孩子，但係身手都好好呀，辛苦的表演是值得我們拍手鼓勵的 。接著，我們去了睇國寶熊貓，它們懶洋洋的睡著，沒有起來與我們打招呼呀。
其間，因為你年紀大，我地沒有去玩機動遊戲呢 ，我地只係行遍了每一個展館，仲去了兩次水母館、兩次海洋館添，很開心.... 你從後抱了我很多遍 ... 最奇妙既係我們乘了兩次纜車，其中一次，坐的纜車編號居然係 "100"號呀 ，真係好妙，好"緣" ...
好開心，我地可以睇到海洋劇場，因為我平時都會miss左，海豚跟海豹好乖、好可愛，表演內容亦有別於以前的，我地仲一人一隻手加埋一齊拍掌呢 。
晚飯啦，我們去了 "銀杏館"，仲食了很多東西，有沙律、湯、牛骨、千層麵，同埋藍苺梳乎厘添... 梳乎厘真係好好味 。
回程時，我第一次 invite 你上我屋企，今次可能係你第一次及最後一次見到一間咁整齊的屋呀 ............
今天的一切，於我而言是很難忘的.... 你也是嗎 ? 你回家後，在電話中說，你覺得今天 "很開心、很幸福、很滿足"，我也是呢 ........ 希望我跟你有著更多的100天 。

2008年10月10日

昨夜，你跟我說了一番話之後，問我是否覺得好shock，我當然唔係覺得shock啦 (好想摸下你個頭)，果一刻，我個心係 "實"左 (又點沉)... 因為我都想你開心，你既唔開心，亦會令我唔開心架麻。我想你好，想你開心，我會愛你更多架，希望你亦同樣的待我 。
粒 u 呀 ~~

2008年10月9日

今朝好掛住你的時候，十點未到，就打了一通電話給你，唔知你開唔開心呢 ?
午飯前後，你都有打電話俾我，係未就係依你昨夜所言，因為見唔到，所以更加要用電話黎keep住聯絡呀.. 你話 "極"掛住我 .. 我好開心呢 。
電話中，你說見到我的時候，會攬住我係我耳邊同我講好掛住我，但我今晚接你放學，你都冇咁做到....扼人既
我冇去做facial，應你所想去接你放學，唔知你又覺得開唔開心呢 ? 但係我記得你之前講過話接放學好醜架喎... 咁即係點呀
接完你放學，去了TST食野，你想試下食 "金水"，但係門口真係好多人，所以我地就放棄左，改為去了茶餐廳，睇住你食野，都幾好呀... (咁夜食野...你今次仲唔肥仔 )。
之後，我地就搭巴士走，一路上，你攬住我，我就伏係你肩膞，好舒服呀.. 差點睡著了...

2008年10月8日

又見唔到你 lu ~~
平時跟你通電話，都係我不停說自己的公司事、家事，或者當天的遭遇，但係好少掉轉由你說給我聽這些事。好似你知我的朋友、同事、老闆的名字，我就淨係知你同 "朋友" 食飯，同 "同學"食飯，你知我的多，但我知你的就相對少了。
今日先知道，原來你係星期一已經買左去海洋公園的門票，抵讚喎，我最喜歡事情已經事先得到安排 ，唔鍾意待事情發生時才決定怎樣做。我記得星期一那天，我去了PP，你亦約了"朋友"係旺角食飯，你打電話給我問我係未confirm星期日去，我已經心諗你咁樣問得我，即係會買定飛啦，但係估唔到你係跟住就去了金鐘買啦，我仲以為你會過幾日買，你真係好 "double E" 喎 ，咁同我好快咁去買左相機的電池的態度係未一樣呀..... 忽然想起，你上次去換chocolate calculator時講過的一句說話，你話早d拿去換，可以留番d buff 俾自己 ..
夜晚在電話中，你feel到我有點 "失落" (not 沮喪 or 生意失敗呀 !!)，逗我說星期日要全日攬實我... 咁我就聽住先啦，次次講就好叻，都唔知係唔係架 ~~
好掛住你從電話筒傳來一下好響的kiss聲音 ..

2008年10月6-7日

這兩天也沒有見到你 ... 不過，都有你逗下我的說話 。
說到你會否喜歡上別人時，你好溫柔咁講你已經將個心放在我身上，沒有多餘的心思去愛別人，仲200%愛我 .... 200%即係有幾多呀 ? 我諗你既意思係好愛、好愛啦....
我說這句說話只表明 "at this moment"的狀態，你先先clarify 話 at this moment means ............. "forever"，跟住就有點改口風話 at this moment means ................... gradually, gradually.... "forever" ，其實你用邊一個版本，只要有"forever"這個字，我都會照單全收架啦..。
聽到你咁講，我真的好開心架，心裡有一種"定"的感覺 ，你越來越抵錫啦 。

2008年10月5日

不停下雨的一天，天文台仲發左兩次黃色暴雨警告添。
下午，我們去了睇 Mamma Mia，都幾好睇喎，歌好聽，風景又美，背景應該是希臘小島吧，海水清澈、夜色優美 ，好想去果度旅行呀... 同你去就更好啦 .. 。
看完電影，我們去到PP逛了一會，準備去波士頓餐廳吃晚飯。出發去餐廳之前，天空下著傾盆大雨，還夾雜著大風，我們在PP3大堂待了一會，雨勢減弱了一點才步行到餐廳，但期間雨勢仍時大時細，我倆各執一把小雨傘，雖然雨下得大，但我們仍可手拖著手呀 ，不過你的手臂同埋衣服就濕了許多，希望你唔會著涼啦..
最後，當然係乘巴士回家啦 。

2008年10月4日

昨晚，你說會於9:30叫醒我，但到10:00見你還未致電給我，所以就諗住調番轉係我打電話叫你起身，但你又係如常接不到我的電話呀，咁我就先起身梳洗，不一會，你就call番我了，但你說覺得身體不舒服，問我下星期才去poly u 可好，那當然冇問題啦.. 我想問多你兩句覺得邊度唔舒服，但你好似好趕住再搵周公個女傾計咁，想快點掛線，那好啦... 你唔舒服，想瞓多一點也無可厚非既。今日見唔到你 lu, 原來 70% 係reach 唔到架。
掛線後，我都想繼續瞓番，但瞓唔到呀，因為掛住你囉... 你又覺得唔舒服 .. 所以就send左個sms俾你。你唔舒服，我個心感覺怪怪的，唔知點形容呀...
今晚，都係唔同你講咁耐電話啦... 你要早點睡，如果唔係你又會頭痛。

2008年10月3日

從來沒有一個係我身邊的人，被我define或者形容為 "男朋友"，因為心裡實在覺得佢地套用不了這個名詞。有時候，與別人談話時，最多都係以"朋友"作為他們的稱呼。但是你不同呢.. 我跟老闆談起你的時候，會以"男朋友"來形容你，亦以這個身份跟家人說你的存在。知道嗎? 你係第一個呀 !! 雖然這個term現在對我來說，仍然有點陌生..

2008年10月2日

睡前跟你談電話，你講過的說話令我個心好甜、好"窩心"呢 ..
你說我係你有史以來最鍾意的一個 ，無論你說真又好、假又好，我都當真的了，我知道你是喜歡我的... 談到點解喜歡我的時候，你說的理由就好像說了一篇我的性格，咁可唔可以話你喜歡我的性格、為人呢? 你話今晚會再講過給我聽架... 唔准又講左第二樣野咁賴皮架 .... 期待著聽你的甜言蜜語..

2008年10月1日

拍拖日 ~~
你係未好掛住我呀?? 一朝早，未瞓醒又未刷牙就打電話俾我 ..
我們先去了沙田逛了一圈，食了IKEA的熱狗，好好味呢.. 有少少少少似去外國旅行咁，企係街邊食熱狗 .. 再行了一陣街之後，我地就入了西貢啦..
係巴士上，很喜歡你抱著我 、吻我，幸好不是有太多人，如果唔係就醜醜囉 (噢!.. 忽然又想起你話我肥)。
我地係西貢行了一會，其實我都幾鐘意果d露天茶座，天氣好的話，有太陽或者夜晚坐係茶座，感覺都好好... relax d, hea 下我就最鐘意啦，係未開始覺得我好懶呢 ... 再晚一點，我們去了一間泰國餐廳吃晚飯，食物都幾好味呀...
天氣不是那麼熱，我們手拖手的時候，亦沒有熱的感覺 ，我地漫步海邊，好sweet呢 ..很喜歡這種拍拖的感覺，很開心 & warm，同你一齊感覺好舒服呢~~