2009年10月25日

今天，約了你媽媽一起吃晚飯。
大約六時許，我到達了你家附近，你從會所出來回家去準備跟你媽媽一起外出吃飯，而我就在商場等你。
見到你的時候，你手上拿著一個袋，袋裡面滿載著你媽媽去美國旅行時買給我的手信，有7樣野咁多呀，真係多謝哂 。
接著，我地乘小巴出佐敦，去了有四十幾年歷史的醉瓊樓吃晚飯，我地3個人點了鹽焗雞 (例)、胡椒豬肚湯、東坡肉、豆腐煲、同埋你最喜愛的菜扒牛丸，食完之後真係飽得很厲害呀 。
食飽飽，我地3個一起行了永安，都行左成個鐘，你買了個濾水器呢。行完之後，就回你家坐下、食雪糕、睇電影啦~~

2009年10月24日

一大早起床，我就忙於清理我個書櫃，把多年來所有筆記及課堂派的notes 全部棄掉，數量多到我執"吉"左幾格書格，連負責倒垃圾的阿叔都連聲多謝我 。而你就去了拜山。
執到大約4時，才差不多執完，此時，你打電話問我仲有冇力行街 ，難得你不用溫書，就梗係ok 冇問題啦，我地約左5時許係荃灣等。
到達荃灣後，行了一會商場，我倆就乘巴士轉戰沙田。行了一田，再行了一會新城市廣場，晚飯就係super sandwiches order 了兩份set，都食到好飽飽。因為你想買一個小腰 bag，係一田買又唔太抵，剛巧記起永安做緊減價，所以我地就乘mtr去佐敦行下永安啦 。
係永安，我地又搵到同款的袋，但係有唔同的色，仲好啦..唔使又黑色，所以你 "好快" 咁決定買下這個小袋子了 。
行完永安，我地就乘小巴回家啦 ~~

2009年10月22日

我呀 .... 真係好愛你同好有誠意囉，你仲有成個幾月才生日，我已經諗好哂節目同你慶祝啦 。
原本，我只係想到時先同你講，叫你執兩件衫出trip，唔話俾你知去邊架，返大陸唔定，去台灣又唔定，好刺激咁 。但睇過 d 自由行 package 後又覺得唔係好啱，所以轉為睇下香港有d咩地方好去囉，再睇下d主題公園 packages，睇到眼花撩亂，咁我唯有話你知，等你可以幫手睇埋一份，同埋順便睇下你的preference 係乜囉。。。穿左添 。
依家呢，係 book 左香港迪迪尼套票，酒店一晚 + 早餐 + 2日樂園門票，詳情遲d先再講啦 。
希望你有一個 "奇妙" 的生日啦 。

2009年10月18日

由於我倆都很疲累，所以睡至中午才起身梳洗，之後我地出了佐敦飲茶。飲茶後，原先我係想回自己家的，因你問回你家坐多一陣可好，我見還有很多時間，都好呀，可以見多一陣嘛。
回到你家，坐在你的梳化，看到天花的水晶吊燈，不經意的說了一句，好想洗下佢，因為水晶燈的水晶太多塵已經不太發亮了，平日你媽在家亦沒可能爬高拆出來洗吧，你見我這樣說，快快口答到 "好呀"，係咁就開始了我不停洗"鑽石"的時間 ，洗完第一粒，見到水晶的"真身"的時候，真係好興奮架，係 !! 我認我係有點變態 ，但洗呀洗，興奮的心情亦隨之退卻，因為有好多好多粒"鑽石"要洗囉，都有幾十粒架。
我地倆個一個洗"鑽石"，一個抹個銅架 (d洗銅水好臭呀 !!)， 洗完抹乾d水晶再掛回原位，叮 "亮燈"一刻，真係好閃令令呀 ，兩個人一起做事確實係會快手好多，接著我地再洗埋另外一盞吊燈。你媽媽回來後，見你執拾了這麼多地方，又抹好吊燈，一定很驚訝 。
大約4時多，我倆一起行去一期商場買燈泡，買完後，你送我上巴士回媽咪家了，回程時，我打了3通電話給我，我問你係未好唔捨得我 。
晚上，你獨自在 food court 吃晚飯，我回到媽咪家吃過飯後，再回到自己家執拾物品，準備出發去你家。在商場會合後，我地買了一些cake回你家慢慢享用。
回你家，一邊吃cake，一邊看 the day after tomorrow，好快就夠鐘睡覺了 。

2009年10月17日

之前一晚，大家各自回家睡覺，今朝一大清早，我就出門去睇醫生、拿衣服去洗、執屋，你就睡至中午，再去剪頸髮。其間，你打電話給我，問我今晚煮多一次飯可好，見係你咋，ok啦。
在旺角 meet 左你之後，我地行左去買了一塊 white board 同埋一些 white board 用的筆，你想有一塊 white board 好耐啦，今次終於買到。隨後再行去街市，買了白菜仔、苦瓜。今次的白菜仔足重多一點，看來上一次我地係被騙了。接著，再返回你家，放下買了的東西，下樓去會所溫書，你就溫書，我就看看報紙、magazine、打機。大約7時，我地就回家煮飯啦。
回到你家，我倆一起洗菜、切瓜、切蒜頭、開罐頭湯、發蛋、拿薑醋解凍、洗米，分工合作，弄好了羅宋湯、苦瓜炒蛋 (你整得好靚呀，一底咁既)、蒜蓉炒白菜仔、薑醋。整完之後，又影了一張大合照。
飯後，我好想睇pride & prejudice，幸好你唔怕悶都陪我睇，睇完再打了一會機，就去睡覺了。

2009年10月15日

生菜 + 八爪魚丸 + 米粉做早餐係未好好食呢 ，昨天你說米粉好好味，今天你說係我煮得好食 。
晚上，放學後，超頻"能"咁返屋企換衫，又準備去你屋企。今次冇搭的士，係搭小巴去旺角再一齊行番去。

2009年10月13日

晚上，我要去上課，而你亦工作至九時許，相約遲一點一起去橫綱吃拉麵。
橫綱的拉麵差左呀，沒有之前咁好味，亦沒有了那"疑似"日本人坐陣，師傅們的手勢亦沒有以前那麼一絲不拘，失望呀.....
吃過拉麵，你先送我回家，同樣地我又執拾細軟，準備出發去你家。最奇妙的是我地call taxi，居然個司機係同前2日果個係同一個人咯，又係慢慢咁 (60km/h) "流" 去你屋企 。

2009年10月12日

今天放工後，約了你在你家附近吃晚飯，因你還未放工，所以我在商場行下等你。
八時許，終於見到你了，問你想去那間餐廳吃晚飯或是買餸在你家煮，因為你家還有一些飯、薑醋，所以最後我地決定買一些菜及罐頭湯回你家玩煮飯仔了。
今次，到你負責炒飯呢 ，又炒得幾好味喎，而炒菜就係我地一齊炒既，但是那罐頭湯俾我地開稀到好淡味囉，原來原裝已經不用開稀的，有別於以前食開果一款。你說偶爾在家煮下飯仔都幾好 。
吃完飯，又係你負責洗碗 ，一起再看一會電視後，我就回家休息了。

2009年10月11日

一覺醒來，你問先吃東西，還是先開工執野，當然吃東西先啦，要不然那裡來力氣呢 。
去了別府點了兩客定食，吃過後，就快手快腳前往麵包店買了一個麵包超人樣的麵包，很似你呢 ，再到星巴克買了兩個 lamington 就回你家開工了。
繼續撕紙，繼續清掉物品，真的坐到pat pat 痛，期間我地看了 "跟蹤"的VCD，我都話你會喜歡看啦... yeah ~
終於都執好啦... 又pack了好幾袋垃圾，清潔阿姐真係多的你唔少，你再執拾了書枱，我幫你抺了書枱的玻璃，你讚我好快手又抺得乾淨呢 。
大概5時，我要回家吃飯了，你送我至巴士站便回家執拾餘下的東西，同埋做 lab。在巴士上，我真的好想睡一下，但你不在我身邊，不敢睡，而且鄰坐的兩位太太談話的聲音實在太大聲了，相信亦無法入睡吧。
好開心晚飯過後又見到你呢，你做完lab，過來找我吃點東西，我地又去了 apm 吃烏冬。吃飽飽後，回我家執拾細軟後，就去你家了，你家的按摩墊真的不錯呢 。

2009年10月10日

早上，弄好我要辦的事情後，打電話給你，看看是否去行街，或是回你家執拾東西，不知怎的你的語氣不太好，有一句沒一句的對答，令我的心沉下了一大半，我都冇做錯事，你為何如此對我喎 。
終於都有一個答案，就是先到你家附近的酒樓飲茶，我話去飲茶係因為我想你是喜歡去的，而且你媽媽不在香港，大概你不會一個人去吧，所以提議跟你一起去。見到面的時候，與你的氣氛也不見得好了，我自己的心情也不太好，由於要輪候很多個號碼才到我們，你提議到另一間酒樓飲茶，你先去看看有沒有位，我就留守原先的酒樓看看會否等到位。不一會，你打電話給我，說你在另一間酒樓找到位了，著我行過去找你。該酒樓在商場的另一端，行過去的時候要途經一段維修中的地板，上一次行經的時候，即使好小心，我的腳仍扭了一下，幸好你當時扶著我呢，今次行經的時候，你再次打電話給我著我小心睇路，你懂得這個時候打電話來關心同埋提醒我，我個心已經原諒了你對我態度不好了，很冇用吧，就是嬲不下了你。
飲茶的時候，才還原平時大家的氣氛，沒頭沒腦的，先前都唔知發生咩事。飲完茶，就一起回你家了。
一進屋，到處都是東西，我地先前計劃在你媽媽去旅行期間清掉你好幾箱的物品，我地分工的碎紙，撕紙，掉文件，掉舊的東西，你真的儲存了很多小時候的物件呢，連小學寫的毛筆紙帖簿都有，不斷撕、不斷碎，弄了6、7大袋垃圾，最終我地執拾至凌晨3時還未弄妥呢 ，我倆都疲憊不堪了。
期間，下午5時多的時候，我地出去了吃龜岭膏、買浴簾、到街市買生果、餸。今天就讓我煮晚飯給你吃吧 ，問你想吃些什麼，估唔到你的答案如此簡單，我仲想著弄一些相對難一點的，既然你答得咁簡單，我就整給你吃吧，有蕃茄薯仔豬骨湯、蒜蓉白菜仔、午餐肉炒蛋 。好好笑... 要寫低一樣野，就係你對舊鞋終於支持不住了，就在我地行緊街市的時候那鞋底幾乎脫掉，害你一拐一拐的就著行回家，試想像一下你個look，兩隻手都拿了餸，行到一拐一拐，仲有一個大肚腩，真係好好笑 。
回到你家，我洗菜煲湯，準備晚飯，你就繼續清理物品大行動。不一會，我就弄好晚飯的準備功夫，你說我很快手呢。接著，我再繼續參予清潔大行動，清掉了很多廢紙，pack 了好幾袋垃圾，你又說我快手，我想 ..... 不是我快，而是你慢手慢腳吧 。
7時多，我就準備炒餸煮飯，你就仍然繼續執拾物品，不一會，可口的晚飯就準備好了，你吃了很多很多呢 ，都說了2、3次 "好味"的0既 。
不停執不停執，我地執到不時要站起身舒展筋骨，的確很累人呢，結果還剩一箱，都係留待明天繼續吧。

2009年10月5日

有趣對話一則。
你：(睇緊我篇blog時說) 架車太"櫈"，唔係太"登"。
我：吓.. 即係點寫呀 ? "木" 字邊呀 ?
你："木" 字邊係"橙"，唔係"櫈"呀~
我：咦.. 係喎

2009年10月4日

星期日的早上，我倆都好早起床，因為今天你媽媽飛去美國，我地去送機 。
十時半，我地在東涌會合後，一起乘巴士去機場，上車後，你去放行李，我與你媽媽先坐下，此時你媽媽被坐位前的小梯級絆倒，"嘭"的一聲撞向車身的玻璃 ，嚇死我 !! 幸好，沒有撞親咋 。
到達機場後，與你媽媽的親戚會合後，先去辦理check in 手續，那時才知道旅行社沒有幫你們劃位呢，幸好到最後她們也可以坐單邊位，接著大夥兒到 Terminal 2 的"潮館"飲茶，食物不是太美味，我們亦不是吃了很多。飯後，再返回 Terminal 1，送她們入閘了，你媽媽再三吩咐，叫你每日出門口前記得check 下是否關掉電源同埋水掣，最少講左3、4次，她真的怕你忘掉了呢 。
她們入閘後，我倆亦離開機場回東涌了。回到東涌，我地買了旅遊車車票去大佛及回程的昂坪360纜車票，由東涌去大佛的車程需時40分鐘，沿路車子都很"櫈"，差點想嘔呢 。
到達目的地後，我們先上香祈求合家平安，接著，由於先前車子太"櫈"，已經加速我們之前吃的食物落格，所以我地先去齋堂吃齋 ，入齋堂前是先須要購票的，有兩款飯餐選擇，一款係每位 $60 元的普通餐，另一款係每位$100元的豪華餐，你沒有意見隨我選擇，我看餐牌研究食乜好的時候，賣票的職員不斷係你面前說 "一場黎到，食好d啦..."，好像要你係女朋友面對要買個貴一點的餐來賺點面子，但唔好意思，我從來都唔睇這些來斷定你對我好與唔好的 ，而且我喜歡吃普通餐的餸多一點，所以我們還是要了普通餐呢 。
四餸一湯白飯任添，有沙葛春卷、冬菇白菜仔、勝瓜青瓜西芹青椒粒、栗米麻辣豆腐、冬瓜湯及一煲白飯任添，你居然仍可以吃下兩大碗飯，簡直技驚四座 。每樣餸都好新鮮、好好味，值得一試架 ，你也很愛吃呢 。
飯後，我地去參觀大佛，行到不斷 "深呼吸" ，幸好今天天氣很好，有很清涼的風不斷吹送，所以不致太辛苦或者行到濕哂。遊了一圈後，我們便走回那長長的樓梯，向昂坪市集進發。昂坪市集沒有什麼特別，反而我倆係星巴克買了一大杯綠茶沙冰，坐在涼傘下休息了一會，真係寫意，我個腦已經浮現了明天不想上班的message 。
休息夠了，我們往纜車站排隊乘纜車回東涌，起初以為排隊的人龍好短，殊不知原來站內還有兩個蛇餅，等了20分鐘左右才上到纜車呢。本來我對乘纜車還有一點興致，但同車的國內朋友實在令我倆興致大減，所以我地只係手拖著手，靜靜的享受這段 "時光" 。
回到東涌，行了一會 outlet，沒有特別的東西想買，所以就乘車回中環了。
回到中環，我地想去莎厘娜餐廳吃晚飯，但要 8 時才有位，所以我地又折返中環，去大會堂的美心經典懷舊西餐廳晚飯，點了牛柳串燒餐及焗豬扒飯餐，每樣都好好味，下次我地要試下他們的金必多湯呢 ，你著我提你下次帶你媽媽一齊來吃。
晚飯後，乘"叮叮"到銅鑼灣行了一會，就乘小巴回家休息啦 ~

P.S. 今日本地旅遊一日後的感覺係 ----> "我要減肥" 。唔係口號呀 !! 你都要呀 !!你睇下你個大肚腩，大到就黎睇唔到 d 腳指啦 ~~~

2009年10月3日

今天，你很早已經起床了，先跟你媽媽飲早茶，待下午1時多，就跟我去爸爸媽媽家慶中秋。
到達家中不久，你先把前一天幫爸爸燒錄好的DVD交給他，仲好細心的帶備了你自己的黑色墨水筆讓他寫碟面，真的麻煩你了，唔該哂 ，我爸爸又開始不停講佢要講的 "故事" 了，很長氣吧 。
你買來的金華火腿月餅，爸爸媽媽都很喜歡吃呢，多謝你呀 。接著，就到我地家中最大的娛樂，麻雀耍樂是也，你今天運氣好好呀，不斷嬴錢。你不斷嬴錢，我就不斷把食物送上，有湯丸、蘿蔔糕、月餅、冰皮月餅、茶、湯等等，你吃了很多很多，真的飲飽食醉呢。大約6時許，你先行離去，準備跟你媽媽食中秋飯，而我就留在家中跟家人吃中秋飯。
吃過中秋飯，我倆又相約外出一起過中秋節，在尖吵咀會合你後，一起前往維園，我們還以為維園有很多花燈呢，原來只有兩三款而已，很失望呀 ，又"冇燈籠玩" ，正當我們準備離去之際，才發現原來球場果邊坐滿了人，很多人一家大細圍在一起吃月餅、玩蠟燭、燈籠，行了小小一段路，由於人太多我地就折返了，離開維園時，還兩個人吃一支甜筒呢 。
由於明天要早起身送你媽咪機，所以我地就早早回家了 ~

2009年10月1日

今天是渣打銀行發行面值$150紀念鈔票的日子，原來之前，你也有去趁熱鬧呢 。你參予了認購自組鈔票號碼，選擇了用我們開始拍拖的日子作為鈔票編號，很可惜最後落空了，你說你肯花$800但仍抽不中呢 ! 你先前沒有提及過參予認購，目的是希望在一週年那天給我一個驚喜，現在驚喜弄不到，你很失望呢 ! 你說給我知的時候，我真的不知道該給你何種反應，但我心裡確是既開心又驚訝，雖然抽不中，但想不到你會這樣做呢，我是欣賞你那份心意 。
下午，我地想約一些朋友去打羽毛球，你說我的技術係 "正常"，我說 "還未發揮應有的水準呀 " 。打了2小時，有一點疲倦呢，不過好好玩 。既然我倆都係打得兩板，下次可以在你屋苑 book 場打一小時呢，做下運動，身體都好d 啦 。